RUS
SMARTNEWS.KZ басылымының хабарлауынша, Қырғызстан президенті Кенесары хан туралы жарияланған видеоға пікір білдірді
Қырғызстан президенті Садыр Жапаров Кенесары хан туралы тараған бейнероликке байланысты желіде жазба жариялады. Бұл туралы қырғыз басшысының Facebook желісіндегі жеке парақшасында жазды.
Оның жазуынша, «қырғыздар қазақ халқына қарсы сыртқы күштермен бірігіп әрекет етті деген сияқты ойға келмейтін тұжырымдар жасау арқылы» бейнеролик авторы тарихи фактілерді әдейі бұрмалаған.
Жапаров бейнероликте бұрмаланған деп санайтын бірнеше тарихи сәттерге тоқталған.
«Ол (Кенесары хан – ред.) нағыз батыр болған. Алайда оның қырғыз жеріне кіріп, тиісті тойтарыс алғанын жоққа шығаруға болмайды», – деп жазды Жапаров.
Ол ханның әскері жеңіліске ұшыраған Кенесары мен қырғыздың Ормон ханы арасындағы келіссөздер мазмұны мен қазақ-қырғыз қақтығысының мәнін негізге алған.
«Дала мен таудың лайық жауынгерлері тоғысқан ашық шайқаста Ормон хан жауын жеңіп, нағыз жеңіске жетті. Ешқандай қиянат жасаған жоқ», – дейді Қырғызстан басшысы.
Оның айтуынша, Кенесары ханның басы Ресейге жеткізілгені орыстар оның өліміне сенбегеннен.
«Кенесары Омбыдағы орыс гарнизондарына да шабуыл жасады, сондықтан делегация «Мәйітті бізге сараптамаға беріңіздер, оны Омбыға алып кетеміз» деген өтінішпен келеді. Осылайша Кенесарының басы алдымен Омбыға, кейін Петербургке жеткізілді».
Қырғызстан президенті екі ұлт өкілдері, әсіресе, жастар мұндай арандатушылықтың құрбаны болмайды деп үміттенетінін жазған.
«Біз ғасырлар бойы нығайып келе жатқан жақындықты, құда-жекжаттық, туыстық қарым-қатынасты мақтан тұтуымыз керек. Мен, мысалы, мұны мақтан тұтамын. (...) Мен белгілі бір дәрежеде қазақ халқының жиенімін», – дейді Жапаров.